Sýnataka og efnagreiningar á vatni, gasi og jarðefnum eru meginsvið jarðefnaþjónustu ÍSOR. Við leggjum metnað í að tryggja viðskiptavinum örugga og faglega þjónustu og vinnum eftir alþjóðlegum stöðlum. Hjá ÍSOR starfar hópur efna-, jarðefna- og jarðfræðinga sem byggt hefur upp sérfræðiþekkingu í sýnatöku og efnagreiningum, einkum fyrir jarðhitaiðnaðinn á Íslandi.
Efnagreiningar á jarðhitavökva geta gefið vísbendingar um líklegt hitastig í viðkomandi jarðhitakerfi, auk áhættumats fyrir útfellingar og tæringu. Efnagreiningar geta einnig gefið hugmyndir um suðuferla, streymisleiðir vökva og uppruna jarðhitavökvans.
Virkt efnaeftirlit með jarðhita- og grunnvatnskerfum er nauðsynlegt eigi að tryggja sjálfbæra nýtingu auðlindanna.
Efnagreiningar ÍSOR nýtast
- jarðhitaiðnaðinum
- hitaveitum
- vatnsveitum
- fiskeldi á landi
- umhverfis- og mengunarrannsóknum
- lyfjaiðnaðinum
Rannsóknarstofa ÍSOR er sérútbúin til efnagreininga
- jarðhitavatn
- kalt vatn (neysluvatn, grunnvatn og yfirborðsvatn)
- jarðhitagas og -gufa
- ferilefni í vatni og gufu
- borsvarf
- útfellingar og tæringarafurðir
- berg
- kristalbygging lyfjaefna
Efnagreiningartæki
Rannsóknarstofa ÍSOR er búin fullkomnum tækjum til efnagreininga. Eins er ÍSOR í góðu samstarfi við aðrar rannsóknarstofur í landinu sem og erlendis hvað tækjabúnað og þjónustugreiningar varðar, til dæmis fyrir snefilefni, næringarefni og lífræn efni í vatni og einnig samsætur (t.d. 2H, 13C og 18O).
- Rafgaslitrófsmælir (ICP-OES) greinir málma og hálfmálma í vatnslausn (t.d Si, Na, K, Mg, Ca, Fe, B, Mn og Al).
- Litrófsmælir er notaður til greininga á SiO2, NH3 og fleiri efnum.
- Jónaskilja (IC) er notuð til mælinga á anjónum í vatni (F, Cl, Br, I, SO4, NO3).
- Gasskilja með varmaleiðninema (GC-TCD) greinir magn gastegunda í sýnum frá jarðhitasvæðum en þær eru helstar N2, H2, O2, Ar, CH4, CO2 og H2S.
- Gasskilja með rafeindagleypninema (GC-ECD) greinir magn flúorinnihaldandi gastegunda (SF6, PFC) sem notuð eru sem gufuferilefni á jarðhitasvæðum.
- Vökvaskilja með flúrljómunarnema (HPLC-FLD) er notuð til að greina flúrljómandi naftalensambönd sem notuð eru í ferilefnaprófum.
- Flúrljómunarmælir er notaður til greininga á flúrljómandi efnum svo sem flúoresceini og rhódamíni, einkum í tengslum við ferilefnapróf og rennslismælingar.
- Röntgentæki (XRD). Til greininga á kristalgerð fastra efna, til dæmis útfellingum í lagnakerfum, steindum í bergi, leir í svarfi frá borholum, tæringarafurðum og ýmsu öðru.
- Rafeindasmásjá (SEM), skoðar og greinir uppbyggingu og samsetningu útfellinga og annarra fastra efna. Tækið er staðsett hjá Tæknisetri.
- Auk þess títratorar, leiðni- og pH-mælar og fleiri smærri efnagreiningatæki.
- Rannsóknarstofa ÍSOR á að auki sérútbúinn sýnatökubíl með öllum búnaði til sýnatöku af jarðhitavökva og grunnvatni.
Gæðakröfur
Við viljum tryggja vönduð vinnubrögð og fagmennsku í allri okkar þjónustu, hvort sem er við sýnatöku eða efnagreiningar. Rannsóknastofa ÍSOR hefur ekki faggildingu skv. rannsóknarstofustaðlinum ISO-17025, en kröfur hans eru hafðar að leiðarljósi. Rannsóknastofan starfar eftir vottuðu gæðastjórnunarkerfi samkvæmt ISO-9001:2015.
Hafðu samband